நிறுவனரின் வரவேற்புரை
புவியியல் பாடத்தில் கிடைத்த அனுபவம், தந்தையின் தாக்கம், குழந்தையை மையமாகக் கொண்ட பள்ளியின் தொடக்கம் ஆகியவற்றைப் பிருந்தா துரைராஜ் பகிர்ந்துகொள்கிறார்.
சம்ஸ்காரா — அன்பும் மகிழ்ச்சியும் நிறைந்த, வழக்கத்திலிருந்து மாறுபட்ட ஒரு பயணம். சிறியவர்களும் பெரியவர்களுமாக, அன்பும் ஆர்வமும் சுதந்திர உணர்வும் கொண்டவர்களின் பயணக் குறிப்பு.
ஐந்தாம் வகுப்பில் எங்கள் புவியியல் ஆசிரியர் மதிப்பெண்களை வாசித்த குரல் இன்னும் கேட்கிறது. அவர் கையில் கடைசித் தாள் மட்டும் இருந்ததால் பதற்றம் கூடியது. என் பெயரைச் சொல்லி “99” என்று வாசித்தார். நான் வகுப்பில் முதலிடம் பெறுபவளாக இருந்ததில்லை. ஆசிரியரின் ஆச்சரியம் எனக்கு மகிழ்ச்சியும் சங்கடமும் அளித்தது. நாங்கள் பல நாடுகளைப் பற்றிப் படிக்கும்போது அந்த நாடுகளுக்கே என்னை மனதால் அழைத்துச் சென்ற என் அப்பாவுக்குத்தான் அந்த மதிப்பெண்ணின் பெருமை.
திரும்பிப் பார்க்கும்போது, அன்றே விதைகள் விதைக்கப்பட்டதை உணர்கிறேன். கற்றல் அனுபவமாக இருக்க வேண்டும். அது நமக்குள் உணர்வுகளை எழுப்ப வேண்டும்.
ரூமியின் வரிகளில் எனக்கு நம்பிக்கை உண்டு: புனிதமான இடத்தின் நுழைவாயில் உனக்குள்ளேயே இருக்கிறது என்பதை நினைவில் கொள்.
கற்றல் என்பது ஒருவருக்குள் நிகழும், கண்ணுக்குத் தெரியாத செயல் என்பதைப் புரிந்துகொண்டேன். சூழலும் படைப்பாற்றலுடன் தயாராகும் பாடங்களும் தூண்டுதல்கள். கற்றலை உருவாக்குபவர் கற்பவரே.
இந்த எண்ணங்கள் மலர்ந்தபோது மாண்டிசோரி முறையை ஆராயும் வாய்ப்புக் கிடைத்தது. எஜுகேஷன் அண்ட் பீஸ் நூலில் மரியா மாண்டிசோரி, சூழலின் மீதான அன்பே மனிதரைக் கற்கவும் படிக்கவும் உழைக்கவும் தூண்டுகிறது என்கிறார்.
மதிப்பெண்களும் ஒரே மாதிரியான கற்றல் முறைகளும் முன்னிலைப்படுத்தப்பட்ட காலத்தில், குழந்தையை மையமாகக் கொண்ட மாண்டிசோரி கல்விமுறையில் நான் கால்பதித்தேன்.
இருவர் தொடங்கிய பயணம் குழந்தைகளின் உணர்வை மதிக்கும் ஒத்த சிந்தனையுடையவர்களின் குடும்பமாக வளர்ந்தது. வழிகாட்டிகளாக, எங்கள் குழந்தைகள் ஆர்வத்துடன் கற்க அவர்களுக்குள் இயங்கும் ஆற்றலை உணர்கிறோம். பள்ளியின் பிறப்பு ஒரு சிறப்பு நிகழ்வு. அதன் பணியை நிறைவேற்றுவதில் நமக்குள்ள பங்கை ஒருவருக்கொருவர் நினைவூட்டுகிறோம்.
இந்தப் பெரிய பணிக்கு சமூகத்தின் பங்கேற்பு தேவை. இந்தப் பயணத்தில் பெற்றோர்களுக்கு முக்கியமான பங்கு உண்டு. அவர்களின் நேரடி பங்கேற்பை வரவேற்கிறோம். குழந்தையின் நலனுக்காக நாம் இணைந்து பணியாற்றுகிறோம்.
சம்ஸ்காரா அகாடமியுடன் நானும் புதிதாய்ப் பிறந்தேன். அன்பும் மகிழ்ச்சியும் கொண்ட என் பயணம் தொடங்கியது…
