கல்வி

சம்ஸ்காராவில் கற்றல்

குழந்தை முதன்முறையாகக் கையாளும் மாண்டிசோரி தட்டு முதல் பத்தாம் வகுப்பு ICSE தேர்வு வரை, கேள்விகளும் உபகரணங்களும் ஒன்றாகக் கண்டறியும் அனுபவங்களும் எங்கள் வகுப்பறைகளை வடிவமைக்கின்றன.

மாண்டிசோரி உபகரணங்களுடன் ஆராய்ச்சி

சம்ஸ்காராவின் கற்றல் சூழல்

வகுப்பறையிலும் வளாகம் முழுவதும் ஒவ்வொரு நாளும் கண்டுபிடிப்புக்கான வாய்ப்புகள் உள்ளன. குழந்தை தனக்குப் பிடித்த உபகரணத்தைத் தேர்ந்தெடுக்கிறது; ஒரு கருத்தைக் கண்டறிந்து அதை மீண்டும் முயல்கிறது. பூங்காவிலும் மணல்வெளியிலும் பல வயதுக் குழந்தைகள் ஒருவரை ஒருவர் கவனித்துக் கொள்கிறார்கள். வழிகாட்டிகள் அருகில் இருந்து அமைதியாகக் கவனித்து, தேவைப்படும்போது உதவுகிறார்கள். பதில்களைப் போலவே குழந்தையின் சந்தேகங்களையும் வரவேற்கிறோம்.

வயது 2.5–6

காசா மாண்டிசோரி

ஆரம்ப, ஜூனியர், சீனியர் மாண்டிசோரிக் குழந்தைகள் கலப்பு வயதுச் சூழலில் கற்கிறார்கள். குழந்தைகள் தங்கள் வேலையைத் தேர்ந்தெடுத்துச் செய்வதை அமைதியாகப் பார்க்க அவ்வப்போது பெற்றோரை அழைக்கிறோம். மூத்த குழந்தைகள் இளையோருக்கு உபகரணங்களைப் பயன்படுத்துவது, இடத்தைப் பகிர்வது, சுற்றுப்புறத்தைப் பேணுவது ஆகியவற்றைக் காட்டுகிறார்கள்.

அன்றாட வாழ்வும் புலன்களும்

கேரட் துருவுதல், பாத்திரம் கழுவுதல், கோட்டோடு துணியை மடித்தல் போன்ற சிறு வேலைகளில் குழந்தைகள் இயக்க ஒருங்கிணைப்பையும் கவனத்தையும் ஒழுங்கையும் மற்றவரைக் கருத்தில் கொள்வதையும் பயில்கிறார்கள். புலன்சார் உபகரணங்களால் மென்மை, சொரசொரப்பு, அளவு, ஒலி வேறுபாடுகளை ஆராய்ந்து, வட்டம், செவ்வகம், பிரமிடு போன்ற வடிவங்களைக் கைகளால் உணர்கிறார்கள். குழந்தை அனுபவித்த பிறகு அந்தப் பண்புக்கான பெயரை வழிகாட்டி அறிமுகப்படுத்துகிறார்.

மூன்று மொழிகள்

உரையாடல், கதைகள், பாடல்கள் மூலம் புதிய சொற்களை அறிகிறார்கள். ஆங்கிலச் சொல்லின் ஒலிகளைக் கேட்டு, நகர்த்தக்கூடிய எழுத்துகள் மூலம் சொற்கள், சொற்றொடர்கள், வாக்கியங்களை அமைக்கிறார்கள். இம்முறையில் எழுதுதலைத் தொடர்ந்து வாசிப்பு வருகிறது. தமிழ், இந்தி ஆகியவற்றிற்கும் மாண்டிசோரி உபகரணங்களைப் பயன்படுத்தி மூன்று மொழிகளிலும் வாசிக்கவும் எழுதவும் பயில்கிறார்கள்.

எண்களும் இயற்கை உலகமும்

மனக்கணக்குக்கு முன் உண்மையான அளவுகளைப் பார்க்கிறார்கள். எண்ணும் பொருட்களையும் எண் குறியீடுகளையும் கையாண்டு கூட்டல், கழித்தல், பெருக்கல், வகுத்தலுக்குச் செல்கிறார்கள். வீட்டுச் செடி முதல் விலங்குகள், நிலவடிவங்கள், கண்டங்கள், நினைவுச் சின்னங்கள், கோயில்கள் வரை குழந்தை காணக்கூடிய அல்லது கற்பனை செய்யக்கூடிய பொருட்களிலிருந்து தாவரவியல், விலங்கியல், வரலாறு, புவியியல் தொடங்குகின்றன.

குழந்தைகளுக்கான சமையலறை

குழந்தைகளுக்கு ஏற்ற சமையலறையும் உணவுப் பொருட்கள் வைக்கும் இடமும் வகுப்பறைச் சூழலின் ஒரு பகுதி. சிற்றுண்டிக்காகக் காய்கறிகளையும் கீரைகளையும் வளர்க்கிறார்கள். வீட்டுக்குக் கொண்டு செல்ல அடுமனையில் உணவு தயாரிக்கிறார்கள். சாதம், தோசை, சப்பாத்தி செய்தும் பார்க்கிறார்கள். ஒன்றாகச் சமைக்கும்போது முறை காத்தல், கருவிகளைப் பகிர்தல், முடிந்ததும் சுத்தம் செய்தல் ஆகியவையும் கற்றலில் சேர்கின்றன.

வகுப்புகள் 1–5

தொடக்க நிலை

ஒரு பொருள் எப்படி இயங்குகிறது, ஒரு வேலையை ஏன் இப்படி செய்ய வேண்டும் என்று தொடக்க நிலைக் குழந்தைகள் கேட்கத் தொடங்குகிறார்கள். மாண்டிசோரிச் சூழலில் ஒரு கேள்வியைத் தொடர்ந்து விரிவாக ஆராய நேரம் கிடைக்கிறது. வழிகாட்டுதலுடன் ஆய்வின் தொடக்கம் முதல் முடிவு வரை திட்டப்பணிகளுக்கான பொறுப்பை ஏற்கிறார்கள். தாங்களே ஒன்றைக் கண்டறிவது மனநிறைவையும் தன்னம்பிக்கையையும் அளிக்கிறது.

ஒரு புதிய இடத்துக்குச் செல்லும் வழியைக் கற்றுக்கொள்வதுடன் இதைப் பள்ளி ஒப்பிடுகிறது. நாமே அந்த வழியில் பயணம் செய்தபின் வழிகாட்டுதல்கள் தெளிவாகின்றன. கைகளால் உபகரணங்களைக் கையாள்வது அத்தகைய நேரடி அனுபவத்தைத் தருகிறது. பயிற்சியைத் தொடரும்போது நுட்பத்தையும் கருத்துகளின் தொடர்பையும் புரிந்துகொண்டு உபகரணம் இன்றியும் சிந்திக்கத் தொடங்குகிறார்கள்.

காசாவில் மாண்டிசோரி எண் உபகரணங்களுடன் பணிபுரியும் குழந்தை
காசாவில் மாண்டிசோரி எண் உபகரணங்களுடன் பணிபுரியும் குழந்தை
தொடக்க நிலை வகுப்பறையில் ஒன்றாகப் பணியாற்றுதல்
தொடக்க நிலை வகுப்பறையில் ஒன்றாகப் பணியாற்றுதல்
வகுப்புகள் 6–8

நடுநிலைப் பள்ளி

6–8 வகுப்புகள் ICSE முறையை அடிப்படையாகக் கொண்ட ஒருங்கிணைந்த பாடத்திட்டத்தைப் பின்பற்றுகின்றன. தனிப்பாடங்களுடன் ஒரு பொதுக் கேள்வி அல்லது கருப்பொருளை இரண்டு அல்லது அதற்கு மேற்பட்ட துறைகளுடன் ஆசிரியர்கள் இணைக்கிறார்கள். பாடத்தை ஆழமாகக் கற்கும்போதே படைப்பாற்றலுடன் ஆராயவும் இடம் கிடைக்கிறது.

வகுப்புகள் 9–10 · ICSE

உயர்நிலைப் பள்ளி

9 மற்றும் 10 ஆம் வகுப்புகள் ICSE வாரியப் பாடத்திட்டத்தைப் பின்பற்றுகின்றன. உயர்நிலைப் பள்ளியின் முதல் ஆண்டிலிருந்தே பொதுத்தேர்வுக்கான ஆயத்தம் தொடங்குகிறது. பாட வகுப்புகள், செய்முறைப் பயிற்சிகள், தேர்வுகள் மூலம் மாணவர்கள் தங்கள் புரிதலைப் பயன்படுத்தவும் மறுபரிசீலனை செய்யவும் வாய்ப்புப் பெறுகிறார்கள்.

வகுப்பறைக் கதைகள்

காசா மற்றும் தொடக்க நிலை ஆசிரியர்கள் தங்கள் வகுப்பறைகளிலும் சமையலறைகளிலும் நிகழ்ந்த அனுபவங்களைப் பகிர்கிறார்கள்.

புதிர்ப்பாதையில் ஒரு சாதனை

சிறு கைகளும் கால்களும் செயல்படுவதைப் பார்ப்பதே அழகு. கனமான தட்டைக் குழந்தையிடம் நம்பிக் கொடுப்பீர்களா? நாங்கள் கொடுக்கிறோம்! காசா குழந்தைகள் தட்டில் தண்ணீர்க் கிண்ணத்தை வைத்து, புதிர்ப்பாதை வழியாக மிகுந்த கவனத்துடன் நடந்தார்கள். கண், கை, கால் மூன்றும் ஒருங்கே செயல்பட்டன.

கண்ணாடி, மண் அல்லது எஃகுப் பாத்திரமாக இருந்தாலும் குழந்தைகள் தாங்களே விரும்பித் தேர்ந்தெடுக்கிறார்கள். நாம் வைக்கும் நம்பிக்கை அவர்களிடம் பொறுப்பையும் சுயசார்பையும் வளர்க்கிறது. பயிற்சி முடிந்ததும் சீனியர் மாண்டிசோரிக் குழந்தை ஒன்று தானாகவே முன்வந்து துடைப்பானால் தரையைச் சுத்தம் செய்தது. இளையவர்கள் அவள் பொதுவிடத்தைப் பேணியதைப் பார்த்தார்கள். இச்செயல்களில்தான் மரியா மாண்டிசோரியின் சுயசார்பு பற்றிய கனவு நனவாவதைக் கண்டோம். சின்னச் சின்னச் செயல்களில்தான் எவ்வளவு மகிழ்ச்சி!

16 சமையல் கலைஞர்களுடன் 60 நிமிடங்கள்

கேரட், உருளைக்கிழங்கு, வெங்காயம், தக்காளி, சோளம், பட்டாணி எனக் காய்கறிகள் வரிசையாகக் காத்திருந்தன. அவர்களுக்காகத் தைத்த மேலாடைகளை அணிந்த நம் சமையல் கலைஞர்களின் சிறு கைகள் கழுவின, தோல் சீவின, நறுக்கின, துருவின. அந்த ஓசைகள் புதிய தொடக்க நிலை சமையலறையை நிரப்பின.

குக்கர் விசிலடித்ததும் ஒரு கணம் அமைதி. பன்களில் வெண்ணெய் உருகியது. வெந்த காய்கறிகளுடன் மணமிக்க மசாலா கலந்து, மேலே கொத்தமல்லி தூவப்பட்டது. சமைத்ததோடு நின்றுவிடவில்லை; கடைசிக் கரண்டி வரை கழுவி எடுத்த இடத்தில் வைத்தார்கள். “ஒவ்வொன்றுக்கும் ஓர் இடம்; ஒவ்வொன்றும் அதன் இடத்தில்.” சில நொடிகளில் சிற்றுண்டி குழந்தைகளின் வயிற்றைச் சென்றடைந்தது. சுவைத்து உண்ணும் ஓசைகளும் புன்னகையும் காலித் தட்டுகளுமாக பாவ் பாஜியின் கதை முடிந்தது.

அழியாத கதைகள்

இயற்கை அன்னை உட்பட எல்லோரும் கதைசொல்லிகளே. கோடை விடுமுறைக்குப் பின் தொடக்க நிலைப் பகுதி பயணங்கள், குடும்பத்துடன் கழித்த நேரம், தாத்தா பாட்டி வீட்டுச் சந்திப்புகள், பிரபஞ்சத்தின் தோற்றம் எனக் கதைகளால் நிரம்பியது. குழந்தைகள் தங்கள் சுற்றுப்புறத்தை ஆராய முடியும். ஆனால் விண்மீன்கள், நிலவு, சூரியன், நமது கடந்த காலம் போன்றவை அவர்களின் கைகளுக்கு எட்டாதவை.

மாண்டிசோரியின் முதல் பெருங்கதை பெருவெடிப்பை அறிமுகப்படுத்துகிறது. மர்மமும் அறிவியல் விளக்கமும் கலந்த உயிரோட்டமான மொழி ஐந்து முதல் பன்னிரண்டு வயதுக் குழந்தைகளின் கற்பனையைத் தூண்டுகிறது. துகள்கள் இயற்கை விதிகளைப் பின்பற்றி அமைந்த கதையைக் கேட்கும் குழந்தைகளும் தங்கள் புதிய சூழலில் பழகி, மேலும் அறிய விரும்புகிறார்கள். மாண்டிசோரி முறையில் “பேராற்றல்” என அழைக்கப்படும் இயற்கை அன்னையின் மீது நன்றியும் மலர்கிறது. மனிதர்களுக்குக் கதைகள் மீது தீராத பற்று. கதைசொல்லிகள் மறைந்தாலும் பெருங்கதைகள் மறைவதில்லை. நீங்கள் உங்கள் குழந்தைகளுக்குக் கதை சொல்வதுண்டா?

காலை நேரக் கண்ணீர் உங்களுக்குப் பரிச்சயமா?

பள்ளி வாசலில் பெற்றோரிடமிருந்து பிரியும் கணமே ஒரு சிறு குழந்தையின் நாளில் மிகக் கடினமானதாக இருக்கலாம். சிலர் மகிழ்ச்சியாகக் கையசைப்பார்கள்; வேறு சிலர் புதிய இடத்தையும் புதிய பெரியவர்களையும் கண்ணீருடன் அணுகுவார்கள். “காசா டி பாம்பினி” என்றால் “குழந்தைகளின் இல்லம்”. தேர்வு செய்யவும் நகரவும் பேசவும் கைகளால் வேலை செய்யவும் உள்ள சுதந்திரம், இந்த இரண்டாம் வீட்டைத் தனதாக்க உதவுகிறது.

வழிகாட்டிகள் அன்புடன் அருகில் இருந்து குழந்தை ஆராய இடம் தருகிறார்கள். பள்ளியில் இருக்கும் நேரம் ஒரு மணி நேரத்திலிருந்து படிப்படியாக ஒரு முழு நாளாக வளரலாம். துடைத்தல், சுத்தம் செய்தல், சமைத்தல், வெட்டுதல், வண்ணம் தீட்டுதல் ஆகியவை பொறுமையையும் ஒத்துழைப்பையும் சொந்தம் என்ற உணர்வையும் தருகின்றன. அழுதுகொண்டே வேலை செய்யும் குழந்தை சிறிது நேரத்தில் வேலையில் மூழ்கிவிடும்; அல்லது சிறு தோழர் ஆறுதல் சொல்வார். மூத்தவர்கள் உடன்பிறந்தவர்களைப் போல் கவனிக்க, இளையவர்கள் அவர்களைப் பார்த்துக் கற்கிறார்கள்.

கல்வியின் தனித்துவமான வடிவம்

“ஸம்” என்றால் முழுமை, “ஆகார” என்றால் வடிவம் அல்லது ஆளுமை எனப் பள்ளி தனது பெயரை விளக்குகிறது. கலப்பு வயது வகுப்புகளில் குழந்தைகள் ஒருவரிடமிருந்து ஒருவர் கற்கிறார்கள். தொடக்க நிலையில் பள்ளியிலேயே நடைபெறும் மதிப்பீட்டால், அன்றாடப் பணிகளில் ஒவ்வொரு குழந்தையின் முன்னேற்றத்தையும் ஆசிரியர் கவனிக்க முடிகிறது. பாலினச் சமத்துவத்தைக் கருத்தில் கொண்டு சீருடை வடிவமைக்கப்பட்டது. சுற்றுச்சூழல் மீதான பள்ளியின் அக்கறை வளாகக் கட்டிடங்களிலும் இடம் பெறுகிறது.