Samskaara Academy

சம்ஸ்காராவின் கல்விமுறை

கலப்பு வயது வகுப்பறையிலும் குழந்தைகளின் எழுத்திலும் அவர்கள் இணைந்து தயாரிக்கும் சிற்றுண்டியிலும் மாண்டிசோரியின் தத்துவங்கள் எவ்வாறு உயிர்பெறுகின்றன.

மாண்டிசோரி கல்விமுறை

“வாழ்க்கையின் முழுமையை ஒருவர் கற்றுக்கொள்ளும் இடமே பள்ளி.” — ஜே. கிருஷ்ணமூர்த்தி

ஒரு பாடத்தை முழுமையாகப் புரிந்துகொள்ளக் குழந்தைக்கு உதவுவதே எங்கள் பணி. கற்றல் நிகழும் விதத்துக்கு முக்கியத்துவம் அளிக்கிறோம். ஒவ்வொரு குழந்தையும் அன்பு, புரிதல், மரியாதை பெறும் பாதுகாப்பான சமூகத்தை உருவாக்க விரும்புகிறோம். தங்கள் மதிப்பையும் சுய ஒழுக்கம், பொறுப்பு, சுதந்திரம் ஆகியவற்றுக்கிடையிலான தொடர்பையும் குழந்தைகள் உணர்கிறார்கள். அவர்களின் ஆர்வமும் வியப்பும் வளர இடமளிக்கிறோம்.

மக்களையும் சுற்றுச்சூழலையும் குழந்தைகள் நேசிக்க, அவர்களை அன்புடனும் புரிதலுடனும் வளர்க்கிறோம். தங்கள் திறன்களைக் கண்டறியவும் பழகவும், இயற்கையின் கொடையை உணரவும், பிற உயிர்களைக் கவனித்துக்கொள்ளவும் வழிகாட்டுகிறோம். தாராளம், கருணை, நன்றி, கற்பனை, படைப்பாற்றல் ஆகியவற்றுக்கு வகுப்பறையில் இடமுண்டு.

மாண்டிசோரி முறையில் குழந்தை தானே தேர்ந்தெடுத்துக் கற்கிறது. இது உடல் மற்றும் மன வளர்ச்சியை ஊக்குவிக்கிறது. பல நாடுகளிலும் சமூகங்களிலும் குழந்தைகளைக் கவனித்து மேற்கொண்ட ஆய்வுகளிலிருந்து இம்முறை உருவானது. கற்கவும் ஆராயவும் உழைக்கவும் குழந்தைக்குள் உள்ள உந்துதலைப் பெரியவர்கள் கவனிக்க வேண்டும்.

மாண்டிசோரி கல்வியின் வழிகாட்டும் கோட்பாடுகள்

மரியாதை

ஒவ்வொரு குழந்தையும் தனித்துவமானவர். ஆசிரியர் அதனை மதித்து, அவரைச் சுற்றியுள்ள மக்களையும் பொருட்களையும் மதிக்க வழிநடத்துகிறார். படிப்படியாக உயிருள்ளவை, உயிரற்றவை அனைத்தின் தொடர்பையும் குழந்தை புரிந்துகொள்கிறது.

தயார் செய்யப்பட்ட சூழல்

வளர்ச்சியின் ஒவ்வொரு நிலையையும் கருத்தில் கொண்டு வகுப்பறை அமைக்கப்படுகிறது. தனியாகவும் குழுவாகவும் வேலை செய்ய வாய்ப்புகள் உண்டு. உடல், அறிவு, சமூக உணர்வு மற்றும் உணர்ச்சி வளர்ச்சிக்கு இச்சூழல் உதவுகிறது.

கலப்பு வயதுக் குழு

ஒரே வயதினரிடமிருந்தும் வெவ்வேறு வயதினரிடமிருந்தும் கற்றுக்கொள்ள முடிகிறது. தேவைப்படும்போது பெரிய குழந்தைகள் முன்வந்து உதவுகிறார்கள். ஒருவருக்கொருவர் துணையாக வாழப் பழகுகிறார்கள்.

அனுபவத்தின் மூலம் கற்றல்

குழந்தை தனக்குப் பொருத்தமான வேலையைத் தேர்ந்தெடுக்கிறது. புலன்கள், உடல், மனம் அனைத்தும் அதில் ஈடுபடும்போது ஆழமான அனுபவம் கிடைக்கிறது. கண்டுபிடிப்புக்கும் சிக்கலைத் தீர்ப்பதற்கும் தொடர்ந்த கற்றலுக்கும் அது வழி வகுக்கிறது.

கற்பனை

ஆரம்ப ஆண்டுகளில் புலன்களின் வழி ஆராய்வதிலிருந்து கற்பனை விரிகிறது. பலவித முடிவுகளுக்கு இடமுள்ள செயல்கள், புதிய எண்ணங்கள், தொடர்புகள், தன்னுடைய வெளிப்பாடு ஆகியவற்றை ஆராய வாய்ப்பளிக்கின்றன.

வாழ்க்கைக்கான கல்வி

“நானே செய்ய உதவுங்கள்” என்ற குழந்தையின் விருப்பத்தை மதிக்கிறோம். அன்றாட வேலைகள், சமூக அனுபவங்கள், அறிவுசார் பணிகளின் வழி சுயமாக வாழத் தேவையான திறன்கள் வளர்கின்றன. சேர்ந்து செயல்படும்போது பிறரின் தேவைகளையும் குழந்தை உணர்கிறது.

அன்றாட வாழ்வின் பயிற்சிகள்

மழலையர் மாண்டிசோரி சூழலில் குழந்தைகள் தானியம் ஊற்றுதல், மாவு சலித்தல், மோர் கடைதல், துணி துவைத்தல், தைத்தல், காய்கறி நறுக்குதல், மேசையைத் துடைத்தல், செடிகளைப் பராமரித்தல் போன்ற வேலைகளைச் செய்கிறார்கள். விருப்பத்துடன் மீண்டும் செய்வதால் நுண் இயக்கத் திறனும் பொறுமையும் வளரும். செயலின் வரிசை, விகிதம், ஒருங்கிணைப்பு, பகிர்வு, பொறுப்பு ஆகியவற்றை அனுபவத்தில் கற்கிறார்கள். காசா மற்றும் தொடக்க நிலையில் காலையுணவுக்குப் பொருட்களை வாங்கக் கோருவது முதல் சேமித்து, தயாரித்து, பரிமாறி, இணைந்து உண்பது வரை குழந்தைகள் பங்கேற்கிறார்கள்.

சம்ஸ்காராவின் மாண்டிசோரி சமையலறை

காசாவில் கழுவுதல், தோல் உரித்தல், பழங்களையும் காய்களையும் நறுக்குதல், மேசை துடைத்தல், பொருட்களைப் பிரித்தல் போன்ற வேலைகள் அறிமுகமாகின்றன. சுமார் ஆறு வயதில் தொடக்க நிலைக்குச் செல்லும்போது, 1 முதல் 5 ஆம் வகுப்பு வரை உள்ள சிறு கலப்புக் குழுக்கள் தங்கள் சிற்றுண்டியைத் தயாரிக்கின்றன. சிறியவர்கள் உணவை எடுத்துவந்து அடுக்க, மற்றவர்கள் நறுக்கி, அளந்து, கலந்து, செய்முறையின் வரிசையைப் பின்பற்றுகிறார்கள்.

தேவையானவற்றை எடுத்து வைத்து, அளவைப் பார்த்து, எதை எப்போது சேர்ப்பது என்பதை நினைவில் கொள்கிறார்கள். மொழியில் சொற்களின் வரிசைக்கும், கணிதம் மற்றும் அறிவியலில் செயல்படிகளுக்கும் உள்ள பொருளைச் சமையலில் உணர முடிகிறது. வீட்டில் ஒரு சிற்றுண்டியைத் தயாரிப்பதோ விருந்தினருக்குப் பரிமாறுவதோ குடும்பத்திற்குப் பங்களிக்கும் தன்னம்பிக்கையை வளர்க்கிறது.

மாண்டிசோரியில் எழுத்துப் பணி

எழுதுதல் தன்னை வெளிப்படுத்தவும் பிறருடன் தொடர்புகொள்ளவும் உதவுகிறது. குழந்தை எழுதும் ஒவ்வொன்றுக்கும் ஒரு நோக்கம் உண்டு.

ஜூனியர் மாண்டிசோரியில் எழுத்துலகிற்குள் படிப்படியாக நுழையும் குழந்தைகள், தொடக்க நிலையில் தங்கள் எண்ணங்களையும் கற்றவற்றையும் தங்கள் சொந்த வார்த்தைகளில் எழுதுகிறார்கள்.

உபகரணங்களும் ஆசிரியரின் செயல்விளக்கமும் கருத்துகளை அறிமுகப்படுத்துகின்றன. பின்னர் குழந்தைகள் ஆராய்ந்து, காரணத்தைக் கண்டறிந்து, தாங்கள் புரிந்ததை எழுதுகிறார்கள். சுமார் ஆறரை முதல் ஏழு வயது முதலே கவிதை, வடிவ எழுத்து, உரையாடல், புனைவு, அபுனைவு அல்லது ஒரு முழுப் புத்தகமாகக்கூட தங்களை வெளிப்படுத்த இடமுண்டு.